“Renessans” milliy mukofoti

“Renessans” milliy mukofotini o‘tkazishdan asosiy maqsad — O‘zbekiston Milliy media birlashmasiga a’zo bo‘lgan ommaviy axborot vositalari vakillarini, jumladan, televideniye va radio sohasida faoliyat yuritayotgan ijodkorlarni, jurnalistlarni, muharrirlarni, prodyuserlar va boshqa soha mutaxassislarini yuksak e’tirof etish, ularning jurnalistik faoliyatda erishgan yutuqlari va jamiyatda axborot madaniyatini rivojlantirishdagi hissasini qadrlashdir. Mazkur mukofot orqali milliy kontentni yaratish, axborotning aniqligi va holisligini ta’minlash, ijtimoiy ahamiyatga ega, madaniy-ma’rifiy loyihalarni kengaytirish, shuningdek, OAV orqali Uchinchi Renessans g‘oyalarini keng targ‘ib qilishda faol bo‘lgan ijodiy jamoalar, yosh jurnalistlar va tajribali mutaxassislarni rag‘batlantirish ko‘zda tutilgan. Shuningdek, “Renessans” mukofoti orqali OAV xodimlarining kasbiy mahoratini oshirishga turtki berish, innovatsion va zamonaviy yondashuvlarni rag‘batlantirish, xalq va davlat o‘rtasidagi samarali axborot ko‘prigini mustahkamlash hamda jamiyatda OAV nufuzini yanada oshirishga xizmat qilish maqsad qilingan.